Gradam

Roghnaigh Mairéad an mhúinteoireacht mar ghairm bheatha agus chaith sí tréimhse ag múineadh i gCárna agus Scoil an Droma i Leitir Móir. Thug sí aghaidh ar Ghaeltacht Ráth Chairn i gContae na Mí sa bhliain 1990, áit ar chuir sí fúithi. Ó shin i leith, tá sí lárnach i saol oideachais agus cultúrtha an cheantair. Ceapadh í ina príomhoide ar Scoil Uí Ghramhnaigh, Ráth Chairn, sa bhliain 2001, agus d’fhan sí sa ról sin go dtí 2023. Le linn na mblianta sin, chuir sí béim láidir ar an nGaeilge, ar an gceol, ar an damhsa, ar dhrámaíocht agus ar chultúr Gaeltachta na háite.

Ó tháinig sí go Ráth Chairn, tá Mairéad ag múineadh ranganna amhránaíochta ar an sean-nós. Tá slua mór amhránaithe oilte aici, idir óg agus aosta, agus tá sí thar a bheith bródúil astu ar fad. Cé go bhfuil sí éirithe as an bpríomhoideacht, leanann sí uirthi ag múineadh ranganna amhránaíochta ar an sean-nós do pháistí bunscoile, do dhaltaí meánscoile agus do dhaoine fásta. 

Tá Mairéad pósta le Éamon Ó Donnchadha agus tá ceathrar páistí acu. Caoileann, Deirdre, Éamon Óg agus Diarmaid agus iad ar fad tógtha leis an amhránaíocht agus leis an gceol, ag cinntiú go leanann an traidisiún ceolmhar ar aghaidh ó ghlúin go glúin.